შემოსასვლელი სახლის ის ნაწილია, რომელიც სტუმრებზე პირველ შთაბეჭდილებას ახდენს, შენ კი სახლში დაბრუნებულს სასიამოვნო განწყობას გიქმნის. ამიტომ, მისი მოწყობა განსაკუთრებულად მნიშვნელოვანია. სივრცის ნაკლებობის გამო შეიძლება შენი იდეები შეზღუდული იყოს, ჩვენი რჩევები კი დაგეხმარება, ფართის სიმცირის მიუხედავად კომფორტული და შენს გემოვნებაზე მორგებული შემოსასვლელი მოაწყო.
როგორც ყველა სხვა სივრცის შემთხვევაში, შემოსასვლელშიც მნიშვნელოვანია არა ფართის ზომა, არამედ მისი სწორად მოწყობა და დეკორის ელემენტების კარგად გამოყენება. ხშირად სახლის მოწყობისას უყურადღებოდ რჩებათ შემოსასვლელის ინტერიერი, რადგან ადამიანების ნაწილს ჰგონია, რომ ამ პატარა სივრცის ათვისებაში შეზღუდულები არიან. შენ შეგიძლია შემოსასვლელის ინტერიერში თავისუფლად გამოიყენო საღებავი, შპალერი თუ სხვადასხვა დეკორატიული ელემენტი, რადგან შემოსასვლელის მოწყობისას სულაც არ ხარ შეზღუდული. პირველ რიგში, აირჩიე, საერთო ინტერიერზე მორგებული შემოსასვლელი გსურს თუ მისგან განსხვავებული და თვალშისაცემი.
სკამი სტილისა და პრაქტიკულობისთვის
გამოიყენე შემოსასვლელის ინტერიერში ერთი ცალი სკამი, ეს ტრენდულ სტილს შექმნის. გარდა ამისა, თუ შემოსასვლელში ფეხსაცმელების სათავსო გაქვს სკამი ძალიან პრაქტიკული იქნება, რადგან მარტივად შეძლებ ფეხსაცმლის ჩაცმას. სკამის ქვეშ შეგიძლია კალათა ან ინტერიერზე მორგებული რაიმე სათავსო დადგა, რაც სივრცის მოწესრიგებასა და ადგილის დაზოგვაში დაგეხმარება.
ხელნაკეთი ნივთები და მოხატული კედელი
შემოსასვლელში შექმენი სივრცე,, რომელიც ყოველ ჯერზე აღგაფრთოვანებს შენც და სტუმრებსაც. ტანსაცმლის საკიდების გარდა მინიმალური რაოდენობის ავეჯი გამოიყენე. შენი გემოვნების მიხედვით მოხატე კედელი ან მოახატინე პროფესიონალს, მთავარია ხელით იყოს მოხატული და შეარჩიე ხელნაკეთი დეკორატიული აქსესუარები ისე, რომ მთლიანი ინტერიერი შენს სტილს და ინდივიდუალიზმს გამოხატავდეს.
დიდი სარკე
სარკე შემოსასვლელის შეუცვლელი დეკორაციაა, რომელიც პრაქტიკულთან ერთად სივრცეში სინათლის და სიმსუბუქის შემომტანია. გაითვალისწინე, რომ სარკე უნდა დაკიდო ნათელი კედლის მოპირდაპირედ რადგან თუ კედელი მუქ ფერში იქნება, შემოსასვლელი მთლიანად მუქი და ჩაბნელებული გამოჩნდება. შეიძლება სივრცის სიმცირის გამო კონსოლიანი სარკე ვერ დადგა, მაგრამ აუცილებლად შეიძინე პატარა თაროიანი სარკე, რომელშიც გასაღების მსგავს აუცილებელ ნივთებს მოათავსებ.
წაიკითხე სხვა ბლოგები, რომლებიც პატარა ფართის ბინის მოწყობაში დაგეხმარება:
