სახლის ინტერიერში მცენარეების გამოყენებას ბევრი პლუსი აქვს. გარდა იმისა, რომ ინტერიერს ამშვენებს და ტრენდულია, ადამიანების განწყობაზე დადებითად მოქმედებს და პროდუქტიულობას ზრდის. ამ ბლოგის დახმარებით გაიგებ, როგორ უნდა გაამწვანო სახლის ინტერიერი ეფექტურად.
მცენარის ფოკუსში მოქცევა
პირველ რიგში შეარჩიე შენთვის სასურველი მცენარეები. ფოკუსში მოსაქცევად მცენარეები ერთად არ დააწყო, არამედ ცალ-ცალკე, წიგნის თაროზე, ყავის მაგიდაზე და სხვადასხვა კონსოლზე. ამ განლაგებით მცენარეები ინტერიერში არ ჩაიკარგება და თითოეულის სილუეტი გამოიკვეთება.
ექსპერიმენტული არჩევანი
მცენარე მოათავსე განსხვავებული სტილისა და ფორმის ქოთანში. შეგიძლია ჩაატარო ექსპერიმენტები და იყო შემოქმედებითი. სახლის დიზაინიდან გამომდინარე შეარჩიე სხვადასხვა მასალისგან დამზადებული ქოთნები. ეს საუკეთესო შესაძლებლობაა გამოყო შენთვის სასურველი სივრცე, მეტად თვალშისაცემი გახადო და გამორჩეული ინტერიერი შექმნა.
მცენარეები გარე კუთხეებში
თუ შენს სახლს აივანი აქვს, შეგიძლია განსატვირთველ სივრცედ გადააქციო. ამისთვის, განათავსე მცენარეები აივნის კუთხეებში, გამოიყენე გარე ავეჯი და თუ მსუბუქ განათებასაც დაუმატებ, შენი აივანი მყისიერად განსაკუთრებულ დასასვენებელ სივრცედ გარდაიქმნება.
ვერტიკალური განლაგება
ხშირად, პატარა ბინის მეპატრონეებს ინტერიერის გამწვანება უნდათ, მაგრამ ფართის სიმცირის გამო თავს იკავებენ. პატარა ფართ სულაც არ არის დაბრკოლება. მცენარეების ვერტიკალურად განლაგება ნებისმიერი ფართის ბინაშია შესაძლებელი და საკმაოდ მარტივიცაა. შეგიძლია გამოიყენო სპეციალურად დამზადებული ჩამოსაკიდებელი ქოთნები, ან ფანტაზია გამოიყენო და თავად დაამზადო.
წაიკითხე სხვა საინტერესო ბლოგები ინტერიერის გამწვანების და მცენარეების მოვლის შესახებ:
4 შეცდომა, რომელიც არ უნდა დაუშვა მცენარის მოვლისას
როგორ უნდა მოვუაროთ სახლის მცენარეებს: 6 რჩევა
ფანჯრის ყვავილების იდეა საგაზაფხულო განწყობისთვის