ჭკვიანი სახლი: ამბავი იმაზე თუ როგორ გარდაქმნის ტექნოლოგიები საცხოვრებელ სივრცეს

დაინტერესებული ხართ ჭკვიანი სახლის სისტემებით და არ იცით საიდან დაიწყოთ? აღმოაჩინეთ არქიქარდის პარტნიორი კომპანიები!

ალბათ, ბევრჯერ გიოცნებიათ, რომ მხოლოდ სიტყვებით — ციმციმ აინთე —  ოთახში განათების ჩართვა შეგძლებოდათ, ან დივანზე მოკალათებულს, ყოველგვარი ძალისხმევის გარეშე, სახლში ტემპერატურა შეგეცვალათ, ერთი ბრძანებით კი ყავის აპარატი გაგეაქტიურებინათ. რაც რამდენიმე წლის წინ ფანტასტიკად ჟღერდა, დღეს უკვე რეალობაა. 

ტექნოლოგიების განვითარებამ მნიშვნელოვანი გავლენა მოახდინა ყველა სფეროზე. უკვალოდ არც ყოველდღიურობა დარჩენილა. სმარტფონები და სხვა გაჯეტები ადამიანის ცხოვრების განუყოფელ ნაწილად იქცა. ამ ცვლილებების კვალდაკვალ, საცხოვრებელი სივრცე სრულიად გარდაიქმნა. თანამედროვე ინტერიერის დიზაინი ადამიანის საჭიროებებზე მორგებული გახდა და ჭკვიანი სახლის კონცეფციაც გაჩნდა.

რა არის ჭკვიანი სახლი? 

ჭკვიანი სახლი თანამედროვე ტექნოლოგიებით აღჭურვილი საცხოვრებელი სივრცეა. აქ ყველა მოწყობილობა თუ სისტემა ერთმანეთთანაა დაკავშირებული და ავტომატურად, ან დისტანციურად იმართება. მაგალითად, თუ სახლიდან გადიხართ, ერთ ღილაკზე თითის დაჭერით გამორთავთ შუქს, ჩაკეტავთ კარებს და გააქტიურებთ უსაფრთხოების სისტემას. 

ჭკვიანი სახლის მთავარი არსი იმაში მდგომარეობს, რომ ის თქვენს ყოველდღიურ ჩვევებსა და ცხოვრების სტილს სწავლობს. მაგალითად, სისტემა იმახსოვრებს, რომ ყოველ დილით 7 საათზე იღვიძებთ. ამ დროისათვის ავტომატურად არეგულირებს ოთახის ტემპერატურას, რთავს განათებას და ყავასაც ამზადებს. 

როგორ მუშაობს ჭკვიანი სახლი?

ჭკვიანი სახლის მუშაობის პრინციპი სამ ძირითად ელემენტს ეფუძნება, ესენია:

• მოწყობილობები — აგროვებს ინფორმაცია;
• ცენტრალური სისტემა — ამუშავებს შეგროვებულ ინფორმაციას; 
• პროგრამული უზრუნველყოფა — მართავს მთლიან პროცესს.

ეს ქსელი აპლიკაციას უკავშირება, რომელიც შეგიძლიათ სმარტფონში დააინსტალიროთ. აპლიკაცია საშუალებას გაძლევთ სხვადასხვა რეჟიმი დააპროგრამოთ და თქვნი დღის განრიგს მოარგოთ.

სისტემა თქვენს უსაფრთხოებასაც უზრუნვეყოფს - სახლში საეჭვო მოძრაობის დაფიქსირების შემთხვევაში, შეტყობინებას მფლობელთან აგზავნის. საგანგებო სიტუაციებში კი შესაბამის სამსახურებთან, პოლიციასთან ან სახანძროსთან, დაკავშირებაც შეუძლია. 

თუკი მშენებარე ბინის შეძენას გეგმავთ, მაშინ დროა, ჭკვიანი სახლის სისტემაზე ფიქრი ახლავე დაიწყოთ. გახადეთ სახლი მაღალტექნოლოგიური და შექმენით თანამედროვე, კომფორტული საცხოვრებელი სივრცე თქვენი ოჯახისთვის.

ჭკვიანი სახლის ევოლუცია

ჭკვიანი სახლი ყოველთვის ასეთი ,,ჭკვიანი” არ ყოფილა და სისტემა დროთა განმავლობაში ჩამოყალიბდა. თავდაპირველად ინოვაციად მხოლოდ განათებისა და საყოფაცხოვრებო ტექნიკის მართვა მოიაზრებოდა — ჩამრთველზე თითის დაჭერით ნათურა ინთებოდა, პულტით კი ტელევიზორის მართვა იყო შესაძლებელი. 

პირველი ავტომატიზაციის სისტემები 80-იან წლებში გამოჩნდა. მოწყობილობა სახელად The Clapper ტაშის დაკვრით რთავდა და თიშავდა განათებას. დღეს შეიძლება ეს უმნიშვნელო მიღწევად ჩანდეს, მაგრამ იმ დროისათვის რევოლუციური სიახლე იყო. 

ინტერნეტის განვითარებასთან ერთად გამოჩნდა უსაფრთხოების ჭკვიანი სისტემები. მთავარი გარდატეხა კი 2010-იანი წლებიდან დაიწყო. ბაზარზე გამოჩნდა Amazon Alexa და Google Home. საბოლოოდ, ხმოვანი ასისტენტებისა და სმარტფონების განვითარებამ საცხოვრებელი სივრცის მართვა მარტივ და ინტუიციურ პროცესად აქცია. თანდათან, ხელოვნური ინტელექტის ინტეგრაციით, ჭკვიანი სახლები კიდევ უფრო დახვეწილი და მოქნილი გახდება.

ჭკვიანი სახლის მოწყობილობები

ჭკვიანი სახლში ყველა კომპონენტი ერთმანეთს ავსებს და ერთიან სისტემას ქმნის. ცენტრალური მართვის ბლოკი, რომელსაც ხშირად ,,ჰაბს" უწოდებენ, აკავშირებს და მართავს დანარჩენ მოწყობილობას. 

ჭკვიანი სისტემის დანერგვის გზაზე, პირველი და ყველაზე მარტივი ნაბიჯი განათების საკითხია. ნათურები მოძრაობასა და  დღის განათებაზე რეაგირებს. შესაძლებელია დისტანციურად ან ხმოვანი ბრძანებით მართვაც. 

ტემპერატურის კონტროლის სისტემები სახლში ავტომატურად არეგულირებს მიკროკლიმატს. სისტემა ასევე ითვალისწინებს გარე კლიმატს, დღის მონაკვეთსა და მაცხოვრებლის ცხოვრების სტილს.  

მაცივრები, სარეცხი მანქანები და სხვა საყოფაცხოვრებო ტექნიკა ინტერნეტთან კავშირით მუშაობს. მოწყობილობები აგზავნის შეტყობინებას რეჟიმისა და სტატუსის შესახებ, რომელიც შეგიძლიათ დისტანციურად მართოთ. 

უსაფრთხოების სისტემა მოიცავს კამერებს, სენსორებსა და კარის საკეტებს. თანამედროვე ვიდეოზარით შეგიძლიათ დაინახოთ სტუმარი და გაესაუბროთ მას, მაშინაც კი, როცა სახლში არ ხართ. 

თანამედროვე საცხოვრებელ კომპლექსებში, მაქსიმალური უსაფრთხოებისათვის, სხვადასხვა ჭკვიანი სისტემებია ინტეგრირებული. მაგალითად, ,,არქი” პროექტებში სახანძრო სიგნალიზაციის სისტემას იყენებს. მომენტალური რეაგირებისათვის სისტემა მყისიერად ადგენს ხანძრის კერას, ან პოტენციური საფრთხის შემთხვევაში შეტყობინებას აგზავნის. 

როგორია ჭკვიანი სახლის მომავალი?

პროგნოზების მიხედვით, მომავლის ჭკვიანი სახლი დღევანდლისაგან მნიშვნელოვნად განსხვავებული იქნება. ხელოვნური ინტელექტი, IoT მოწყობილობები ( ერთმანეთთან ინტერნეტით დაკავშირებული ტექნიკა) და განახლებადი ენერგიის წყაროები სრულად შეცვლის საცხოვრებელ გარემოს. ცვლილებების მიზანია — მეტი ავტომატიზაცია, პერსონალიზაცია და ჯანმრთელობის მონიტორინგი.

განვითარებას  ბიომეტრიული ტექნოლოგიები და ხელოვნური ინტელექტი უწყობს ხელს. ამის ნიშნები უკვე არსებობს. ტრადიციულ გასაღებებს თანდათან ანაცვლებს თითის ანაბეჭდისა თუ სახის ამომცნობი სისტემები. 

განსაკუთრებულად საინტერესოა ჯანმრთელობის მონიტორინგის დანერგვა. ცხოვრების სტილისა და ჩვევების შესწავლით სისტემა ჯანმრთელობისათვის სასარგებლო რჩევებს მოგცემთ. 

სავარაუდოდ, ქართველი მომხმარებელი ამ გლობალურ ტენდენციას მალე აჰყვება და ახალაშენებული ბინები თბილისში თანდათან ჭკვიან სივრცედ გარდაიქმნება. 

დაბოლოს, ჭკვიანი სახლი არ არის მხოლოდ ტექნოლოგიური სიახლე. ეს არის ნაბიჯი უფრო ეფექტური, კომფორტული და მარტივი საცხოვრებელი გარემოს შექმნისკენ. მისი განვითარება გრძელდება. ამრიგად, მომავალში ცხოვრების ხარისხის გასაუმჯობესებლად კიდევ უფრო მეტი შესაძლებლობა გვექნება.