სამზარეულოს სინთეტიკური ღრუბელი 1940 წლიდან გამოიყენება. ის გამძლეა, კარგად იწოვს წყალს და მოსახერხებელია სხვადასხვა ტიპის ზედაპირის გასაწმენდად. ჩვენდაუნებურად, ღრუბლის გამოყენებისას ხშირად ვუშვებთ შეცდომებს. ამ ბლოგში ვისაუბრებთ სწორედ იმ შეცდომებზე, რომლებიც სამზარეულოს ღრუბლის გამოყენებისას არ უნდა დაუშვა.
დიდი ხნით შენახვა
თუ სამზარეულოს ღრუბელს ერთ კვირაზე მეტია იყენებ შეცდომას უშვებ. მისი გამოყენების ვადა დაახლოებით ერთი კვირაა, რადგან დროის გასვლის შემდეგ ივება ბაქტერიებით და ასდის უსიამოვნო სუნი.
ნიჟარაში დატოვება
ჭურჭლის რეცხვა ბევრისთვის დამღლელი პროცესია, ამიტომ არავინ გაგამტყუვნებს, თუ რეცხვის შემდეგ ღრუბელს ნიჟარაშივე ტოვებ. თუმცა გაითვალისწინე, მისი ნესტიან ადგილას დატოვებით მიკრობების გავრცელებას ხელს უწყობ. შეგიძლია მოათავსო კალათაში ან საშრობ თაროზე, რათა ჰაერმა იმოძრაოს და ღრუბელი გაშრეს.
მიკროტალღურ ღუმელში მოთავსება
შეიძლება შეგხვედრია ასეთი რჩევა, ღრუბელი მიკროტალღურ ღუმელში მოათავსე და ბაქტერიები განადგურდებაო. ნუ გაითვაისწინებ ამ რჩევას, რადგან ზოგი მიკრობი შეიძლება განადგურდეს, მაგრამ არსებობს მიკრობების ტიპი, რომელიც სიცხეში პირიქით გამრავლდება. იგივენაირად მოქმედებს ჭურჭლის სარეცხის მანქანაც: ნაწილ მიკრობებს ანადგურებს, მაგრამ ნაწილის გამრავლებას ხელს უწყობს. შესაბამისად, ღრუბელი არ მოათავსო არც მიკროტალღურ ღუმელში და არც ჭურჭლის სარეცხის მანქანაში.
სხვადასხვა ზედაპირის გაწმენდა
ხშირია, როცა ღრუბლიის დაზოგვის მიზნით ერთი ღრუბლით წმენდენ სხვადასხვა ზედაპირსაც და რეცხავენ ჭურჭელსაც. ეს შეცდომაა! თუ ღრუბლის დაზოგვა გსურს, თავიდან, როცა ღრუბელს შეფუთვიდან ამოიღებ გაჭერი და ისე გამოიყენე სხვადასხვა დანიშნულებით. ასევე, არ შეინახო გაურეცხავი და გარეცხვის შემდეგ აუცილებლად გაწურე, რათა გაშრობა მოახერხოს.
ქაღალდის ხელსახოცის ნაცვლად გამოყენება
ზოგიერთი რამის გასაწმენდად ქაღალდის ხელსახოცის გამოყენება უკეთესია. ამ შეცდომას ხშირად ვუშვებთ, როცა ნახარშს პირდაპირ ღრუბლით ვწმენდთ. ღრუბელი ნახარშს ისრუტავს, აბინძურებს ნიჟარასაც და სხვა ჭურჭელსაც. უმჯობესია ნახარში ქაღალდის ხელსახოცით გაწმინდო, რადგან მას გამოყენების შემდეგ ეგრევე აგდებ.