ყველა მოზარდი განსხვავდება ერთმანეთისგან, ზოგს სახლში ყოფნა უყვარს, ზოგს ერთი სული აქვს გარეთ გავიდეს. თქვენ თუ თინეიჯერისთვის ოთახის მოწყობას გეგმავთ უნდა ეცადოთ, ისეთი გამოვიდეს, რომ იქ ყოფნა ხასიათის მიუხედავად სიამოვნებდეს. ჩვენი ბლოგი დაგეხმარებათ, რომ სწორედ ასეთი გამოგივიდეთ მოზარდის ოთახი. პირველ რიგში გაგაცნობთ სამი უნივერსალური ოთახის იდეას.
მოზარდის კომფორტული და თანამედროვე ოთახი
1. ეს ოთახი სპორტის მოყვარული მოზარდისთვის იდეალურია. მწვანე ტახტი და საძინებლის იატაკი სწორედ სპორტული მოედნის ასოციაციას იწვევს. საძინებლის ცალკე გამოყოფა და სივრცეებს გადანაწილება დამატებით სიმყუდროვეს სძენს ოთახს და დამოუკიდებელი ბინის განცდას აჩენს, თითქოს ეს მოზარდის ბინაა და არა ცალკე ოთახი. მოზარდებისთვის კი ძალიან მნივნელოვანია განცდა, რომ საკუთარი ბინა, საკუთარი კუთხე გააჩნიათ.
2. ამ ოთახში ყველაფერია მოზარდის კომფორტისთვის. ოდნავი ჩაბნელება სივრცეს მეტად პირადულს ხდის. გათვალისწინებულია სამეცადინო და განსატვირთი ზონები. თუმცა, მთავარი ნაწილი, რაც ოთახს განსაკუთრებულს ხდის დამოუკიდებელი გარდერობია. გარდერობი ისეა გამოყოფილი, რომ ტანსაცმლისა და ფეხსაცმლის შენახვის გარდა გამოცვლაც შესაძლებელია, პატარა ოთახია. დეკორად გამოყენებულია სხვადასხვა ტექსტურა, რაც თანამედროვე ინტერიერს და კომფორტულ სივრცეს ქმნის, ოთახში მცხოვრებ თინეიჯერს აგრძნობინებს, რომ ის სახლშია. ფანჯარასთან მოწყობილი მყუდრო კუთხე კი იდეალური ადგილია მეგობრებთან ერთად განსატვირთად, თუ განცალკევებით წიგნის საკითხავად.
3. ლურჯი და ყვითელი კლასიკური კომბინაციაა, თუმცა ეს ოთახი თანამედროვე სტილშია შესრულებული, ამიტომ ეს ორი ფერი სულ აღარ ჩანს კლასიკურად და ძველებურად. დიზაინი ერთი შეხედვით მარტივია, მაგრამ თანამედროვე დეტალები, გამორჩეული აქსესუარები და ორიგინალური თაროები თინეიჯერისთვის საყვარელ ადგილად აქცევს ოთახს. სათავსოები ისეა განთავსებული, რომ მოზარდ, რომელიც ჯერჯერობით მოუწესრიგებელი და არეულია, საკუთარმა არეულობამ დისკომფორტი არ შეუქმნას. აქ ყველა ნივთვისთვის საკმარისი უჯრა მოიძებნება.
რა უნდა გავითვალისწინოთ მოზარდის ოთახის მოწყობისას
რა თქმა უნდა, ყოველთვის გვინდა, რომ ნებისმიერი ოთახის ინტერიერი საკუთარი გემოვნებით შევარჩიოთ. თუმცა, როცა საქმე მოზარდის ოთახს ეხება ჩვენი გემოვნება გვერდით უნდა გადავდოთ და ბავშვზე მაქსიმალურად მორგებული ინტერიერი შევქმნათ.
- აირჩიეთ ნეიტრალური თემა - მოზარდები აზრს და გემოვნებას ძალიან ხშირად იცვლიან, ამიტომ შეიძლება კონკრეტული თემა მალე მობეზრდეთ, ან არ იყოს საკმარისი, რომ საკუთარი პიროვნება გამოავლინონ. რაც ნამდვილად შეგიძლიათ აირჩიოთ ფუნქციური, თანამედროვე თემაა ტექნოლოგიური დეტალებით, რომელსაც სხვადასხვა „გაჯეტზე“ გამოიყენებს. ასევე, კარგი გადაწყვეტილება იქნება ტრანსფორმირებადი ავეჯის გამოყენება, რადგან საკუთარ სურვილებს მოარგებს.
- ფერთა სწორი პალიტრა - ფერი მოზარდის სქესის კი არა გემოვნების მიხედვით შეარჩიეთ. მოერიდეთ წითელი ფერის მასიურად გამოყენებას, რადგან მოზარდებში გაღიზიანებას იწვევს. თუ წითელი უყვარს მცირე დეკორის სახით გამოიყენეთ, მაგალითად ბალიშებში, პოსტერებსა და წვრილმან ნივთებში.
- დაუტოვეთ ადგილი - აუცილებლად დაუტოვეთ ადგილი სტიკერებისთვის, პოსტერებისთვის, ვინილებისთვის. მოზარდი უდმივად იკვლევს საკუთარ თავს, შეიძლება შეუყვარდეს ონლაინ თამაშები, ავტომობილები, კომიქსები, ფილმები, ტექნოლოგიური განვითარებით ან ნებისმიერი სხვა რამით დაინტერესდეს. ამიტომ, დაუტოვეთ სივრცე შთაგონების გამოსახატავად.
- გამოიყენეთ ბევრი სათავსო - არ აქვს მნიშვნელობა ოთახი პატარაა თუ დიდი და რამდენად დიდი კარადა გაქვთ გამოყენებული, ბევრი სათავსო მაინც საჭიროა, რათა პატარა წვრილმანები სწორედ ისე შეინახოს მოზარდმა, როგორც თავად მოესურვება.
- შექმენით სამუშაო ადგილი - მოზარდობის წლები გადამწყვეტია განათლებისთვის, ამიტომ მის ოთახში საჭიროა კომფორტული სამუშაო კუთხის არსებობა. რაც არ უნდა იტაცებდეს მოზარდს, მას ყოველთვის ექნება სურვილი თავისი საქმე აკეთოს და როგორც უფროსს, საკუთარი სამუშაო ადგილი ჰქონდეს.
მოზარდები დიდ სტრესს განიცდიან, რადგან ცდილობენ სოციალიზაციას, ტრენდების აყოლას და საკუთარი თავის პოვნას. შესაბამისად, მათ ძალიან სჭირდებათ ადგილი, სადაც საკუთარ თავს გამოხატავენ და მყუდროდ განმარტოვდებიან. ყოველთვის ჰკითხეთ აზრი, რადგან ეს მისი ოთახია და მის ინტერესებზე გათვლილი ოთახის შექმნით აგრძნობინებთ, რომ მისი გესმით, გახსნილი ხართ და მის გვერდით ხართ.
არქი ქარდით კი პარტნიორ კომპანიებში მოზარდის ოთახისთვის ავეჯს, ტექნიკასა თუ დეკორს ფასდაკლებით შეიძენთ. ეს არის სპეციალურად არქელებისთვის შექმნილი ფასდაკლების ბარათი, რომელიც ბინის შეძენისთანავე გადმოგეცემათ საჩუქრად.
