ილბაგნოალესი (ILBAGNOALESSI) აბაზანის დიზაინია, რომელმაც თავისი სიტყვა თქვა სახლის დიზაინის სამყაროში და გამორჩეული ადგილი დაიკავა თანამედროვე ინტერიერის დიზაინის მოდაში. ამ ბლოგში სწორედ ამ შთამბეჭდავი დიზაინის აბაზანებს წარმოგიდგენთ.
ოცი წლის წინ იტალიელმა დიზაინერმა სტეფანო ჯოვანონიმ კომპანია „ლოფენთან“ თანამშრომლობა დაიწყო და შექმნა ილბაგნოალესი. ამ კოლექციამ სტეფანოს აღიარება და უამრავი ჯილდო მოუტანა.
კოლექცია თავიდანვე ახლოს იყო ხელოვნებასთან და აღემატებოდა უბრალო, აუცილებელ საგნებს. რადგან მასალები და ტექნოლოგიები ევოლუციას განიცდიდა, სტეფანომ გადაწყვიტა, რომ განვითარება არ შეეწყვიტა. დღესდღეობით ილბაგნოალესში გამოიყენება ახალი კერამიკული მასალა „საფირკერამიკი“, რომელიც თხელი და გამძლე ფორმების შექმნის შესაძლებლობას იძლევა. ასევე, გამოიყენება მინერალური კომპოზიტი, რაც შეხებისას ხავერდოვან შეგრძნებას იწვევს.
ილბაგნოალესი თავისი დახვეწილი ასიმეტრიით, მინიმალიზმითა და ინოვაციური დიზაინით დღესაც აგრძელებს მთელი მსოფლიოს გაოცებას.
