ოთახის ფერის ფსიქოლოგია თქვენი ყოველდღიური ცხოვრების განუყოფელი ნაწილია, რომელიც გავლენას ახდენს თქვენს ემოციურ და ფსიქოლოგიურ განწყობაზე. სწორედ ამიტომ, მნიშვნელოვანია, რომ ოთახის ფერის არჩევისას გაითვალისწინოთ, თუ რამდენად ჰარმონიაში ხართ იმ ტონებთან, სადაც თქვენი დროის უდიდესი ნაწილის გატარება მოგიწევთ.
ამ ბლოგში წარმოგიდგენთ არქის დიზაინერების, მწვანე ინტერიერის ნამუშევრებს.
ინტერიერში მწვანე ფერს ბალანსისა და ჰარმონიის მნიშვნელობა აქვს. ის ბუნების ძლიერი ენერგიების ეფექტს მოიცავს და მარტივად ერგება ინტერიერის დიზაინის ყველა სტილს.
სამზარეულო
დავიწყოთ სკანდინავიური სამზარეულოს ინტერიერით. სკანდინავიური ყველაზე კომფორტულ და პრაქტიკულ დიზაინად არის მიჩნეული. მწვანე ფერი კი, კომფორტთან ერთად სამზარეულოში ჯანსაღ და სუფთა გარემოსთან ასოცირდება, რაც თქვენში აუცილებლად აღძრავს ჰარმონიულ ემოციებს.
მატირების ეფექტით მუქი მწვანე სამზარეულოს კაბინეტი, ხის ზედაპირებით არის წარმოდგენილი რაც მარტივ, მაგრამ დახვეწილ ვიზუალს გვაძლევს. ღია სათავსოებში LED განათების დამონტაჟება თქვენს სამზარეულოს მბზინვარე და ძვირადღირებულ ესთეტიკას შემატებს.
მისაღები ოთახი
მისაღები ოთახი სახლის ცენტრია. ის საერთო სივრცეა, სადაც ოჯახის ყველა წევრი ატარებს დროს გართობისა თუ დასვენების მიზნით. სასურველია, რომ მისაღები ოთახი რამდენიმე ადამიანის გემოვნებას ასახავდეს და მათ ცხოვრების სტილს ერგებოდეს. სხვაგვარად კომფორტისა და სიმშვიდის ეფექტის შექმნა გაგიჭირდებათ.
ამ მისაღები ოთახის მთავარი ნიშა, მწვანე ხავერდის დივანია. ის სივრცეში სიმშვიდის, ჰარმონიისა და სიმდიდრის ეფექტს ქმნის. ხავერდი ძვირადღირებული ქსოვილია, რომელიც კლასიკად ითვლება ინტერიერის დიზაინში. სწორედ ამიტომ, იგი არ კარგავს აქტუალურობას და დიზაინთა სხვადასხვა სტილში გამოიყენება.
საძინებელი ოთახი
სახლში არც ერთი ოთახი არ საჭიროებს სიმშვიდისა და ჰარმონიის განცდას ისე, როგორც საძინებელი. მრავალი ფაქტი მოწმობს, რომ მწვანე ფერს სტრესის მოხსნა შეუძლია. თუ ამ ფერის რომელიმე ტონი გიზიდავთ, მაშინ მწვანე საძინებელი ოთახი, ცხოვრებაში ერთხელ მაინც უნდა გამოცადოთ.
გაითვალისწინეთ, რომ მუქი ფერი ოთახის სივრცეს ამცირებს. სწორედ ამიტომ, არ არის რეკომენდებული ყველა კედლის მწვანედ შეღებვა. აირჩიეთ ერთი კედელი, ამ მეთოდით ოთახში ზონირების ეფექტსაც შექმნით. საძინებლის შემთხვევაში კი, ლოგინის კედლის შეღებვას გირჩევთ. მწვანე ფერი ყველაზე ნაკლებად პრეტენზიულია სხვა ფერებთან შეხამებისას, ასე რომ, თავისუფლად აირჩიეთ ნებისმიერი ფერის დეკორი ან თუნდაც დიდი ზომის ნახატი და მოათავსეთ იგი თქვენს მწვანე კედელზე.
სააბაზანო
მწვანე ფერის აბაზანა, 2020 წლიდან დღემდე, ყველაზე აქტუალური გადაწყვეტილებაა. სააბაზანო ის ადგილია, სადაც დღის დასაწყისისა და დასასრულისთვის ემზადებით. ამიტომ, ამ სივრცეში მშვიდი და ბუნებრივი მწვანე ტონები მშვენიერი არჩევანია.
არ არის აუცილებელი თქვენი სახლის ყველა ოთახი მწვანე ფერში მოაწყოთ, თუმცა ერთი ოთახის ამ ტონებში გაფორმება ან თუნდაც მცენარეების განთავსება თქვენს სახლს გააჯანსაღებს და მეტად სასიამოვნო ატმოსფეროს შექმნის.